Zantin mangtha

Tluangpuia Hilthang
Kolasib

Ka tlai Sikul bang chu ka riltam nen ka haw thuai thuai a. Zing lam a ka nu Bawkbawn bai thing chu chawm in, Chaw thing kan bar nghal hawng hawng mai a. I va han bar lian ve tih thawm ah chuan, ka phu deuh zawk mai a. Ka thianpa pakhat Tetea hi a lo ni a. Tluangpui zanin chu nula rim dun ila, mikhual nula rim tur tha deuh mai ka hria hi a rawn ti a. 

Ka thiante hi chuan High School kan kal lai atang tawh in, ngaihzawng an nei fir fer tawh a. Hmel lam in a lo zir loh chu thuhran, samsei ho hi ka ngam lo ve hrim hrim bawk a. An bul ah hi chuan a eng a mah hma hian, ka lai nghal em em mai thin. Rilru erawh chuan hmeltha tih leh star chu a nei ve fo a. A ruk khan ka star a, an ngaihzawng te kan hriat khan, a ruk vek khan ka ban leh mai a. Ka rilru erawh kha chu a na ve thei viau zel tho a.

Matric passed in Higher kan han kal chho a. Tlem chuan kan in ti huai chho ve hret hret a. Kan class hmeichia pakhat chu hmeltha ka tih thu, ka thutpui pa ka hrilh a. A ni chuan Class Mipa ho zawng zawng hrilh darh in, min han dem rawn ta mai a night kha. Ka zak leh hreawm ti lutuk kha, Class kal te hi hreawm ka tih phah hle thin. Ngaihzawng chu sawi loh hmeltha tih sawi atang ringawt pawn, ka zahna tawk kha ka hmu ve em em a. Chuta tang chuan kum lam upa chho ve zel mahse, ka hmeltha tih zawng ringawt pawh, mi zing ah ka sawi ngam tawh lo. Kha nu min dem vak kha, in ngaihzawnna lam thil a ka thlen san ber a ni a. A bak han thlen nawn tir leh chu, ka ngam thlawt tawh lo a. Ngaihzawng pakhat pawh nei lo in, Class XI ka thleng chu a ni ve ta mai a.

Chutia ka thianpa in mikhual nula rim a rawn sawi pawh chu, ka lo uk sak lutuk duh lo a. Monday ah test tur kan nei a, lehkha zir a ngai nasa lutuk ka ti a. Vawin Zirtawp Ni a ni chauh a, Inrinni leh Chawlhni zan i la zir thei tho a lawm a ti a. Chutia min sawm ngawrh tak viau ah chuan, kan in bul deuh lawk a lo ni bawk nen, ka aw sak ta nge nge a. Kal hma ila kan haw leh hma dawn nia. Vawikhatna hi chu len rei lutuk te hi a that lo an ti a. Zan lam a leng dun tur chuan kan in thlah ta a.

Zanriah eikham chuan kan in siam ta a. Zan dang a TV bul thutthleng sei a mu a. Remote hum run a chhungte en duh zawng pawh entir thei thin love kha. Chutia ka in chei ka nu in an hmu chu, khawnge i kal dawn a min han ti nghal a. Tetea nen saw tah kan leng lawk dawn a kan ti a. Leng suh in tih chu khawi lam ah, a that nasat chu in ah i tawm nasa lutuk a. Lenchhuah ve zauh zauh te hi a tha. Chuti lo chu i a mai ang min han ti zui a. Len chhuah tlem vang a, i a mai ang min han ti chu ka sa tep a. Ka leng chhuak tur mood fuh loh hlau nen, ka in sum tlang ta zawk a. Tetea te in lam pan chuan ka chhuak ta nghal a.

Tetea te in ka va thleng chu, Tetea nu chuan Tluangpui khawi lam ah nge len in tum. Tetea lah khan zanin chu Tluangpuia nula ka rim pui dawn a. In ah hian a tawm nasa leh lutuk a. Bialnu te hi nei se, a in khung lutuk te hi a zia deuh ang a ti che a. Chuti nana chu va kalpui rawh ka lo ti a nih kha a ti a. Chu thu kan hria chu ka thinrim teuh mai a. Thiante nu te han an khum phiar phiar a chi mang si lo a. Amah Tetea pawh chu ka ngei lek lek mai a. Nimahsela a len chhuah permit atan, a lo sawi ve mai mai a nih ka ring leh zawk a. Ka in sum tlang leh thei ta hram a. Tetea pawh chu rawn in siam peih in, kan chhuak dun ta a.

Kal kawng ah chuan i nu hnen ah len permit atan min lo hmang ringawt a kan ti chu, Nia tunlai chu in awm rawh hi min ti reng a. Ti khan ka lo sawi tawp mai a nih kha a ti a. A nui var var a, han thinrim theih pawh chu a ni chuang lo a. Chu lo reng ah kei chu ngaihzawng ka nei a lawm. I tan a nia kan rim dawn ni an ti zui a. Ta deuh deuh chuan ngaihzawng neih ka peih lo. Chu bak ah min duh chuang lo ang. Leng lo in kan in lam ah lo leng leh zawk mai rawh kan ti a. Vawin khan tui kang kan nghak ho a. Zanin ah kan lo leng dawn ka ti vek tawh. A thulh chi loh ang a ti tlat bawk si a. An in lam pan chuan kan kal ta zel a.

An in kan va thleng chu kawngka kan han kik karh karh a. Tute nge in nih tih pah chuan, lo lut rawh u hi an rawn ti a. Kan han lut chu chaw an lo eikham vel chiah a a. Dawhkan vel pawh chu a la hnawk khawp mai a. Nu ber chuan Tetea leh Tluangpuia te ni reng mai, ve teh tlat chuan an ti a. Tetea chuan Mikhual nula awmna hi, Tluangpuia hian a hre thei riau a. Hei kan rawn rim dawn a nih hi an ti ta mai a. Ka zak lutuk chu ka lo sen tawn tawn ringawt a. Inneitu nu Pi Marami chuan ka awi lo lutuk, nangmah bak i ni lo ang. Tluangpuia te chu hei chen an thenawm ah kan awm tawh a. Vawikhat pawh a rawn chuang kai duh hleinem, In ah hian a in khung chawrh chawrh ni mai hian ka hria a an ti chu, ka zak lutuk pawh a reh ta deuh hlek a.

An mikhual nu Irene chuan, hmun a lo ti fel vel mek a. Pi Marami vek chuan, Irene kan veng tlangval fel pahnih in an rawn rim che a nih hi, Thleng kha han sil sawk sawk la, rawn thu phei ve rawh an ti a. A thleng sil zo chu a rawn thu phei nghal a. Tetea chu i lo leng ta tak tak a law, i va han fel em em ve hi a rawn ti a. Kei ai a naupang zawk in chutia min rawn ti chu, in ti puitling hi ka lo ti khawp a. Ka lo ngei lek lek zawk a. Kan bul a rawn thu kan hmu chiang chu, a tek hian ka tek nghal sawk mai hian ka hria a. Amah chuan engemaw ti tak hian min hip veng a. Min hip veng veng a ka hriat lai chuan, ka hnaih ngam lo sawt thung si a. Kan hnaih ngam lo sawt avang erawh chuan, ka hlat phal chuang bawk si lo. Ka sawi tur hre lo chu ka ngawi ta veng veng mai a. Ka rilru erawh chuan thu tamtak a sawi thung a. In va han tawng duh lo em em ve, an han tih tak ah chuan ka harh chhuak thut a. Tetea lah chuan ka ngaihtuahna hria ni awm tak in, kan tawng tlem poh leh kan rilru hian kan sawi hnem thung a lawm an ti a. Chu chu Irene ka tawn leh hriat tan dan a ni.

Irene hi kan veng ah hian Matric Exam turin a lo awm a. Kan lenna nu Pi Marami leh a nu hi Unau an ni a. Pi Marami te in atang a Matric exam tum a lo ni a. Kan District chhung Thingtlang khaw pakhat a awm an ni a. An khua ah chuan a khawsa thei pawl tak niin, Jeep te pawh an nei ve a ni awm e. Buhfai Retailer ni nghal in a pa pawh hi an khaw VCP a nih loh pawn, Member tal chu a ni ve ziah thin a ni awm a. Unau pianpui mipa pahnih nei in, a hmeichhe awm Chun leh naupang ber a ni a. A nu leh pa te pawn an duat ve hle a ni awm e. Tleirawl ngo tak ni in, cher ai in thau ti a sawi tur a ni a. Pian han nalh lo leh chhe khawp a thau erawh chu a ni si lo. A khaikhawm na tha ber chu, amah ah chuan ka duh zawng zawng a awm kim a ni ber.

Hmeichhe hmeltha tih ringawt pawh sawi ngam tawh lo kha, Nula rim ka ching chho ve leh tan ta a. Ka rim zin vang chuan, ka duh thu erawh ka sawi ngam chuang lo a. Ngawi reng in ka leng a, ngawi reng in ka haw ve leh mai thin. Ka danglam tak na erawh chu, kan in lam a ka tih duh loh an in ah chuan ka ti fo thin a. Tumkhat ka Maian hih pui kha ka la hre reng thin. In ah pawh hik ngai lo khan, kan han hih pui ve pek a nih kha. A them tlaw chi lo ni nen, a kuang chu ka hik thler sung mai a. A me paih tur erawh ka paih thiam ta vak lo a. Tih pui ni bawk si kha min sawisel hreh a. Min sawisel lo mai mai niin ka hria. Kha mi tuma an Maian bai kha chu, a phak deuh mai thei a ni. Kei atan erawh tunhnu thleng a, Maian hih ka thiam tanna a ni ta daih a. Matric Exam tur a nih avang leh kei pawh Class XI exam tur ka nih avang in, han len zin viau erawh ka zak deuh a. Hunawl remchang ah hi chuan chhuan lam fahrah tete hmang in ka leng lut reng tho a. A chhan chu nikhat a hmel ka hmuh loh chuan, ka lungleng lutuk hi ka chau ngawih ngawih zel mai a ni.

Keimah ka in ngaih bel nge, a awmna te pawh chuan min be tha ve viau mai a. A awmna te chuan min duh pui ni te hian ka hria a. Ka ngaih te hi a chang chuan a tha viau mai a. Ka lengte pawh hi in ring tawk hian kan leng lut a. Ka haw mut hmun a kan in ngaihtuah leh hi chuan, ka in rintawkna ka hlauh leh vek mai thin. A chhungte chuan min rin vang nge, ka huaisen loh zia an hre zawk, khawlai leh thil pawimawh ah hi chuan zan ah pawh nise min tir dun fo a. Kan tih tur zawng zawng va ti zo in, an in chhung ai mah in pawn ah hi chuan ka hlat zawk a. Kut hmawr a sik chu khawi lam ah, feet thum vel hi chuan a rual a kal chak deuh si khan, a hma ah ka kal lui thin. Ka tlangnel zual hnu phei chuan zing darkhat, darhnih ah te ka hawlh fo a. Sunday leh tih tur an neih hi chuan kan pahnih a in nghak in, tlai eirawng te kan bawl dun a. A chang chuan chawte pawh ka ei ta fo a. Amah ngei pawh kan in ah lo leng in, ka thlah haw leh thin.

Heng zawng zawng ka ngaihtuah hian, ka zing lengte chu thim lut fo in, ka pian leh hmelte chu mi tamtak tan tah pui tham nimahse, min nin leh deuh sawh ka hre ngai lo a. A hming a matric lo passed ve a. A hming a District khawpui ruling VCP fapa ni ta chu, a pa te zar ah MR te pawn a la thawk ve ang a. I tan pawh a hnemhnan awm ang tih turin, amah pawh matric exam mai tur. An khaw awmthei ber pawl fanu a ni tlat si a. A tum tawk chu hmel ah leh rosum ah chuan ka ni lo nasa bawk si. Kan ram neih zau leh kan bawng ngah te han chhuang viau dawn ila, kut hnathawh turte chu an khua ah pawh, keini ai ai in an ngah zawk ang a. Engemaw kuthnathawh loh dan beisei a, matric exam tur hial a kan khua a lo awm a ni awm si. Chuti chung chuan ka bula awm a thlahlel ve nge, a lekhazir tur tihbuai ka hlauh vang a, zan hnih khat kan len loh hi chuan, nizan tinge i lo len loh a ti ve fo a. Kan leng leh hi chu a lo tum bar tawh mai thin a. A tir lam phei chuan min lo be tha duh lutuk vak lo fo a. A hnu deuh ah erawh hlim em em hian kan in kawm chhunzawm leh thin. Ka len avang a lehkha an zir loh deuh te hian, zing lam ah kei chu ka tho hma a. Chubak ah a boruak a nuam zawk bawk a, ka rilru a kal ding zawk a ti daih zel a. Ka zah loh nan a sawi mai mai nge, min thlakhlelh vang tih ka ngaihtuah fo thin.

Tluang takin Matric chu an han exam ta a. Leng chang bawk si, an exam lai em a han len chu nuam ka ti bawk si lo. Ka theih ang ang chuan, leng lo turin kan in sum ve tang tang a. Sunday tlai an lo thlen zet kha chuan, ka in sum zo tawh lo hi ka leng leh nge nge thin. Kan len luh leh tak si ah chuan, haw leh mai ka ui thin bawk si a. Kan haw hi chu ka thim haw leh nge nge thin. Chutiang ang vel chuan an exam chhung thlakhat zet chu, ka in sum ve tang tang thin a. Ka bialnu pawh ni lo ngai chuan, thlakhat chu rei ka ti kher mai. Tluang takin exam an han zo a. An khaw lam ah haw thlak nghal mai a tum a. Zan lam ah in thlah nan a ti a, Ar pumkhat hi a lei a. Zanin chu lo Leng ngei ngei and che, kan kang dawn nia hi a ti a.

Zan an lo thleng chu hman hmawh tawk in chaw ka ei sawk sawk a. Ka chaw eikham chu rang tawk in, Irene te in lam ah ka liam thla nghal a. An in ka zuk thleng thla chu, Ar chu an lo puah fel vek tawh a. Kan han kang nghal sawk sawk a. Kan kan hmin fel hnu chuan Irene chuan, U Tluangpui Arsa kan ei hma in Hmarveng ah ka thil hawn tur min va lakpui lawk teh a. Autorickshaw in kan kal dawn nia a ti a. Hmarveng lam kal tur chuan kan chhuak ta a. A thil hawn tur kan lam fel hnu chuan, U Tluangpuia min hau miah lo la. In thlah zan te a ni bawk a, Tumpui ah Fu beer in zuai ila a ti a. Tha ti lo ti viau mah ila han hnial leh, rilru zau lo nih ka hreh ve bawk si a. Tumpui lam ah Fu beer in tum chuan kan phei leh ta a. A hmun ah chuan tlem ve ve kan in phawt a. Nakin a in tur tlem pai haw ang aw a ti a, tlem chu kan pai haw ta bawk a. Haw kawng ah chuan a vawt e mai! ka khua hi a sik em? ka chal hi han khawih teh a ti a. A chal chu kan han khawih sak a. I pang chu a daih hi maw le ka ti a. A nih leh ka beng hi a ti ta zel a. A beng chu kan han khawih sak leh a. I beng pawh a sat loh hi Karen ti a. A thlen in kawt chu kan thleng a ni ta mai a. Kan Fu beer hawn chu pawn ah kan dah tha a. In chhung a chuan kan lut nghal a.

Arsa chu chhuang lum in kan han ei ta a. In neitu nu Pi Marami chuan tun ah Tluangpuia'n Irene-i a lo ei tir ang an ti a. Zak deuh si tunlai lo nih hlau tawk chuan, a sa hlawm tha deuh chu kan suak a, Irene chu kan barh ta a. Tun ah Irene in a barh let ve ang an ti leh a. Irene chuan chhing la, i ka ang rawh min han ti a. Min rawn barh chiah chu kan meng nghal kawk a. Ar thin min lo barh hi a ni a, Sa thin hi ka ngaina lo hrim hrim a. Min barh tu ka hmai zah bawk si a, Harsa ti tak chuan ka lem ta hram a. Tun hnu hian khang te kha, Pi Marami'n min tih puina a niang a, ka ti rilru fo thin. Arsa kan ei zawh hnu chuan kuhva lei lawk ang a ti a. Kan chhuak dun leh ta a.

Kan chhuak chu U Tluangpui, sual min ti awm an han ti a. Eng a ti maw kan ti chu, Beer te ka in si a a ti a. Ti hran lo e, a hun leh hmun te a awm ve thin a lawm, mahse zawng chhang erawh a tha kher lo a kan ti a. Ni e ti raw, min hrethiam a ka lawm lutuk aw! Zanin kha ka vawihnih in na chiah a ni a. Hmanni ah ka thiannu in in thlah nan a ti a, min leisak a. Chuan zanin kha a ni leh tawp mai, ka sim vang vang tawh ang a ti a. Kan dah that hi kan paih dawn nge, kan in leh ang an ti a. Pawisa seng a kan lei han paih tawp chu, ka ui viau na a. Nakin a hring zel ang tih ka hlau bawk si a. Paih tawh mai ang ka ti a, i thu thu le a ti a, kan paih ta daih a. Kuhva kan lei zawh chuan hmun remchang lai ah kan han thu chawl a.

Chu chu hun remchang ah hmang in, ka thusawi hreh em em mai chu hrilh ka tum ta a. Ka zah theih lohna zawng zawng bak ah tlem puk belh in, Irene ngaihzawng i nei em kan ti ve ta tawp mai a. Chutah an ngawi deuh vang vang phawt a. Dawtsawi miah lo chuan nei e, Kan khua a mi a nia. Mahse ka rilru ah a awm ngai lo hrim hrim, Tleirawl in ngaizawng satliah ang hi kan ni mai. Chu bak ah a ai a duh midang ka nei a. Chu pa lah chuan ka duh tih, a in hrethiam der bawk si lo. A hmeichhia zawkin han hrilh lah ka ngam bik si lo a ti a. 

Chupa a sawi chu ka ni mai ang em, nge midang zawk ni ang aw ka ti rilru nghal a. Tunge chu pa chu han tih ka tum zuau hman a. Midang an lo nih leh si chuan ka rilru a na lutuk dawn si a. Ka zawt zui leh ngam ta lo a. Ka rilru in zanin ah ka hmangaih thu ka hrilh ang ka lo tih pawh chu, ka sawi chhuak ngam ta lo a. Ka awm a nuam deuh tawh e, hawh lut tawh ang hmiang ka ti ta daih a. In chhung ah chuan kan lut dun ta a. In chhung kan lut chu, Irene chu a beer in a kai nge a cool em em mai a. A biak pawh chu kan in be ta mang lo a. Zan a lo rei chho tan nen haw zai ka rel ta a.

A tuk sikul kal a ngai nen, a haw tur pawh ka zuk thlah ta lo a. Ka sikul kal pawh chu ka nguai em em mai a. Ka rilru ah Irene hlir a awm a. An khua a thleng tawh ngei ang a. Kan in hmu leh ang em aw, Lungleng tawk in keimah min ngai deuh in, a haw thla nge. An khua a a bialpa chu, a thlahlel lutuk tawh zawk. Chu lah chu amah bak in a hre si lo. Pawl sawm pahnih chu, Aizawl lam ah ka zir chhunzawm a. A ni pawn Shillong lam ah, Class XI a zir chhunzawm tih Pi Marami sawi ka hria a. Chu chu a chanchin ka hriat awm chhun a ni ta mai.

Zankhat ka inkhawm bang chu, vawin ka tlanchhe bawk si a. Rei vak lo chu service teh ang ka ti a. Rei ve tawk tak stand ah chuan ka ding tawh a. Zawite te a tape play in, ka lung a leng hle mai a. Han lunglen chhan tur ngaihzawng erawh, ka nei der bawk si lo. Chutih lai chuan pa pakhat hian, i hman theih em hi a rawn ti a. Khawi lam ah kan ti chu, chumi khua ah chuan an ti a. Chu khaw hming an sawi chu, ka phu deuh zawk mai a. A chhan chu kum sawm pali liam ta a, ka rilru zawng zawng lo luah tawhtu, Irene te khua a nih vang a ni. Aw thei e tichuan, chuan man lam kan han in rem fel a. An khaw lam pan chuan kan tlan ta nghal a.

Irene chanchin han zawh chhin chu ka chak hle mai a. Pasal a nei tawh nge a la nula reng, Nge van kohna chhang in khawvel a lo chhuahsan tawh zawk. A tawp ah chuan ka zawt ta nge nge a. An khua a lian lo bawk a, a lo hre nasa mai a. An khaw mi Pasal nei in, fa pawh pahnih lai a lo nei tawh a. A pasal chuan nikum hmasa mai khan a boral san a. An khawsak a harsa ve ang reng khawp mai a ti a. A pa te an khawsa thei a ni lawm ni? an pui ve bawk lo a mi kan ti a. A pasal kha an duhpui vak lo a, chubak ah an monu hi an ngamlo a ni ber mai an ti a. Chu thu ka hria chu ka khawngaih hle mai a. An khua chu kan thleng titih ta mai a. Ka pu Irene te in chu min hrilh rawh aw kan ti a. Tehreng mai engtia in hria nge in nih an ti a. Chu zawhna chu chhan har ka ti khawp mai a.

A tawp ah ti hian ka chhang ve ta nge nge a. Ka pu, dawtsawi miah loh chuan Irene hi ka hmeichhe hmangaih hmasak ber a ni. Amah phei chuan min hmangaih ve leh ve loh phei chu ka hre lo. Kan veng ah Matric a exam turin a lo awm a. Chu chu hria in kan rim thin a. A Exam zawh chuan a haw leh nghal mai a. A hnu ah vawikhat mah ka hmu leh ta lo. Mahse chu chu a mah hrilh lo la ka duh Tak zet a ni ka ti a. I duh loh phawt te chuan hrilh teh suh e a ti a.Aw kha kha an in chu a nih kha a ti a, tlem chuan kan tlan muang deuh a. Haw lam ah belhchian deuh ka tum ru ta zawk a. Ka passenger pa ka va drop hnu chuan ka haw leh ta a. Irene te in a tih kha ka thleng phei leh tawh a. A piah deuh ah chuan ding in kan pan hnai a. An mu tawh tih chu in chhung lam thawm awm loh dan atang chuan ka hria a. In tereuh te a chung rangva, a bang erawh dap rawp lam tawh hi a ni a. A chung rangva pawh chu a hlui hmel tawh khawp mai a. Thil ru tur a maw tiin mi in min rawn hmu ang tih ka hlau a. Belchiang ta lutuk lo chuan ka kal leh ta a.

Irene kha ka hmangaih thu kha lo hrilh ta ila, min lo duh ve tak tak ang em le. Min lo duh ta se ka nupui niin chhungkua kan din dun kher ang em. Ka hrilh tak loh avang khan, lungleng deuh in a awm ang a. Tuna a fa neihna hi a nei ta nge ni ang a. Kan khua ah chuan ngaihzawng chu ka nei a. Mahse tleirawl ngaihzawng mai mai a nia a tih kha, a fate pa ni ta hi ni zawk ang. Ka hmangaih thu ka lo hrilh loh chhan kha, ka dawi vang nge khuanu ruat loh D a lo ni hrim hrim vang zawk. Eng pawh nise pasal fanau nei a an awm chu, ka lawmpui hle tur a ni. Mahse tinge ka hmangaih Irene kha, pasal sun a chhungkaw harsa tak a awm tihte chu, ka ngaihtuah chho nasa ta mai a. Kum sawm pali liamta an exam zawh zan te, ka mitthla ah chuan a lo lang uar uar mai a. Ka lungleng lutuk chu ka mittui te chu a tla ta hial a. Sailothangi Sailo hla ka ngaihthlak khat ve tak mai chu kan play a. Lungleng leh khawhar em em mai chuan Kolasib lam pan chuan ka tlan ta zel a.

Ka hmangaihna biahthu han hlan ta ila
Engtin min chhang ang maw tleitir lenmawi in
Min hmangaih hian kei zawng ka ring si lo
Lenthiam a har ka ti nuimawi hmeltha

Mahse e, ka hmangaih min nghilh bik suh aw
Nangmah ngai a damchhung hun hmang tur hian
Mal ka sawm che khiangawi i chan thleng in
Damten leng la, Zantin mangtha

Hun lehni te lo in her danglam zel in
Kumpui sul engzat pawh lo liam mahse la
Ka hmangaihna a chuai dawn chuang si lo
Ai ang i cham reng thin thinlai ruk ah

Ka hmangaihna thamral an ka phal nem maw
Mahse i rem thei silo maw lal nunnem
Engtin tuar zel ang maw i zun leng ngaih
Khuanu ruat loh di tawn a har ngei mai