Ka kiss ngam loh vangin min then

Rowlance Zip Chawnhlun

Vawin chu ka hnathawh pah in thil hlui deuh deuh ka ngaihtuah mai mai a, ka nuih tuh tuh chu. 

High school kan zirlai a nia, pangai ve deuh chuan ka ngaihzawng neih hmasak berna a ni.
 

Vawi khat chu ṭhian ho a kan ṭhut khawm ṭhep ṭhawp lai in chu nu te reuh chuan, 'keichu bialpa te min kiss ngam lo hi an nep ka ti' a ti ta mauh mai a. Engvanga han sawi ta mai nge a nih ka hre lo, a sawi duh a nih pawh in a hun leh hmun kha thlang fimkhur ve deuh se tih hi voin ni thlenga ka diary ah pawh ka minute, ka la edit miah loh a ni. Kan thil tih lai ṭheuh chu kan chawl ṭhap a, a reh diak, sawi zui tur re re a awm tawh lo, tunge a sawi chhan lah kan hre chiang em em vek mai bawk si, khawvel hi a vir hrih lo a ni ber. Kha tih lai a ka hmel awm dan kha ka zir leh thiam tawh lo hrim hrim, han ngaihruat ula, 'aaa...hetiang em em hi chu a nilo ang' ti ula, kha ai khan a mak hret ang. Ka thianpa khan ka zah tluk zet in min lo zahpui ve a. A mit mengah chuan a rilru a nat ve bakah min dem lek lek bawk tih ka va hmu thei.

Add caption

Kan hun hmasa lamah han kir hlek ila. A ni nen khan kan in hmelhriat dan pawh a dangdai viau reng a. Vawi khat chu ka ṭhianpa nen hian school bang ho bus châng tur lo tlan thla dum dum ho kha kan lo chang a. Hrui chu kawngah khâm in, kawng sira hnim bukah chuan kan biru ve ve a, an lo tlan thlak lai taka hrui pawh mar chu kan plan a ni.
 

Nakin lawka ka bialnu mumal lo tak la ni mai tur chu kan bitum kher kher a, chumi tlai ber kher chu an lo stay back vei khanglang nen, kan châng chhuak har phian lehnghal. Tichuan le, a hnu fe ah chuan, an stay back tlai khawhnu nen, an bus nân hman loh hlau chu bâklengin an rawn tlan thla chiah reng a. A hmasa berah chuan kan school ah pawh luck pawl, hmelṭha leh pian thiam tak mai kha, bag su hlawp hlawp khawp in a rawn tlan thla châwn châwn mai a, chuvel leh ka ṭhianpa nen chuan hrui chu kan lo pawt mar ve chiah mai a, a in pal awk chiang teh a sin. A nu lian bawka keini pawh kawngpuiah min hnuk dâwk chhuak zawk thei. A ni ve thung chu khawvel dît hian a bawk tlu thlawrh mai teh reng a, pui tak a ni.
 

Tichuan ka ṭhianpa nen chuan 'aw haw le' tih leh tlanchhiat kan rual a. Mahse thui kan tlanchhiat hma in, nasa namen lo tak mai a hmeichhia aw lianpui ṭap ruah ruah ri kan hre mai chu, kan hlauthawng hnuhnawh a, kan va bawisawm leh ta nge nge nih kha.

Chuta ṭang chuan a hmai belkang nei nuai nen chuan ka hmel duh ta tlat mai a, min haw em em mai te kha ka duhna ti zual tu an ni mah a. A rawmawla a hmai a khuh ṭawk ṭawk te chu duhawm hi ka ti em em mai ni. Tichuan ka ṭhianpa leh a ṭhian nu hmalakna in engtin tin emaw chuan kan in ngaizawng chu a ni ve ta mai reng a.

In ngaizawng ve ta na na na chu eng eng emaw tih te hi a lo ngai ve a. A hmeichhia zawk lah chhelo ve tak, ngaihzawngte pawh lo thlak ve dih diah tawh, kei ai a advance daih mai kha a nia.
 

Ṭum khat chu ka ṭhianpa hian chance pek dun min tum ve a, 'tun ṭum chu i kiss ve tak tak a ngai tawh. Aaaa....i ngam leh dawn chuang lo kuah ve tal mai rawh, ka en thla dawn che u nia, i kuah ve tal tawh loh chuan ka hnek ang che' a ti riap mai a, a huphurh awm khawp mai. Hnek nge kuah huphurh awm zawk kha ngaihtuah tham a tling, mahse huphurh zawk chu ka nei ru kiau mai a.

Tichuan min thlah fâl a, chance chu min pe ve ta a lawm, enga mah hma in sawi tur ka hre lo nghal. A mah kha ṭawng char char se, um/aih in lo chhang char char ila, chu pawh aw khur lo hram in tih chu ka beisei tawk a ni. Mahse ka hâwi kual velna lamah chuan ka ṭhianpa chu thingkung phenah ka va hmu, a lo meng sen tawh nasa mai, a kut zai zir chuan 'kuah ta che' a rawn ti ṭawk ṭawk a, a kut tum min rawn hmuh bawk, den lutuk.

Ka ṭhiani hnung lamah chuan zawi muangin ka bân chu ka phar chho dê dê a, a dâr chu ka hnaih hret hret a, a thlen dawn a ruaiah ka bân chu a khur ta mai. Keimah hrim hrim kha tisa leh ruh neilo ang mai ka ni, savun hampuar ang lekin ka zâng a ka mur chhuak vek. Ka kut khur chuan a dâr chu a va khawng fuh hman a niang chu, rannung thlawk vel emaw a ti ni ngei tur a ni, ka bân chu a rawn vei kiang ta dawt mai. Awi awi awi, tui so zen ang zâwk a ni mai. Lungtum quintal 100 min phuar hnan se tuifinriat, nilo tuifinsawm thleng pawh in, chutah chuan min thlak vang vang se ka ziaawm deuh ang ka ring.

Chutia ka kut a vai palh chu a inthiam lo hle mai a, pawi a tih hmel ngawih ngawih bawk. Mahse e, engang pawn înthiam lo kual vel mahse ka kuah ngam tawh pit ang, huaisenna zawng zawng nen thih tha in ka va ban ve kha a nia, a na a sin. Mahse a dâr kha chu ka dek ve hman chiang a lawm. Tun hnu hian ka ṭhian ṭhenkhat te bulah chuan kuah hman angin ka in sawi.

A ni nen khan hun hlimawm tak sawi zui tur kan nei meuh lo a, ṭum khat Tiranga hmuam tui dan ka zirtir chiam bak kha chu thil ropui teh vak a thleng lo. Ka kiss ngam loh vanga min ngaihnep tak hnu phei kha chuan kan inbe zui ta meuh lo. Chu thil chu a ni pangai taka ka ngaihzawng neih hmasak ber chanchin chu (pangai in tih leh tih loh kha chu in thu nise).
 

Awle, hei hi ka sawi duh. Kha nu kha ka friend list ah hian i la awm in ka hria, ka thuziak hi i lo chhiar a nih chuan hei hi lo hre rawh. Ka tleirawl ino lai i tawng fuh a, a hunlai khan ka hmulthi bak eng thil dang mah a tho ngai lo pawh a ni thei e, ngaihzawng nei ve e tilo chuan ka chil bak ka lem ngai lo pawh a ni thei. In kai dun rial a uire mual ni awm tak tak a han len dun vel pawh kan nei lo a ni thei. Mahse hei hi ka hrilh ang che, Tunah chuan ka ngam vek tawh.