Ka dem lo che

Tluangpuia hilthang
Kolasib

Tleirawl lai pawh a hmulphurh chhe ve chi nih nak a lai a. Kum sawmli hnaih lam ah chuan, ni hnih khat lek hmuihmul leh khabe hmul meh loh zeuh pawn, a lo var tuar zel tawh mai a. Eng ang pawn in sawi naupan tum mah ila, kan naupan chhiat tawh loh zia min puan chhuah sak leh fo thin.

Ka tih tur hre lo zankhat chu Facebook ah bawk chuan kan lut leh a. Nula han kawm fal tur melh ve viau mah ila, an pian kum kan han en a. Ka matric zawh hnu fe a piang te, an lo ni nawk hlawm a. Tlem a kum lam han upa ve deuh lah chu, a nei tha ber ang hrim in an inbox an ti tui ek dawn nge, ka va biak ve na te chuan reply a hlawh mawlh bawk si lo. Mahni wall a nula thlalak lo lang, like leh comment lo pek kha kan tih ve ngam tawk a ni mai a.

Ka wall a nula thlalak lo lang zing ah chuan, ka mit la deuh mai pakhat hi a awm ve a. A pian kum kan han en chu, kum sawm leh panga zet mai hian kan lo in thlau a. Amah a nu lian in a zahawm hmel zek mai a. Inbox atang han biak chu ka ngam ang em aw tih ka ngaihtuah a. Han inbox ve ta chawt ila ka pu ti a min lo chhan chuan hnar chu, a te dawn lo tih chu a chiang sa a. Ka Inbox ngam loh lah chuan ka friend list, sangli thelh zing a pakhat kha a ni ve mai dawn si a. Bawngpui pawn luang no tho a lawm a duh ti chuan 'Tha maw' tih chu kan thawn ve ta tawp mai a. Ka thawn zo zak lutuk chu lak let leh theih a ni tawh bawk si lo a. A bing hian ka bing nghal mum mum mai a. Ka kum phu tawk ka lo hai a ni. Kei te chu tlem ber ah kum 30 chung lam be tur a sin maw le ka nih, ka ti rilru nghal mawlh mawlh a. Ka rin ang ngei chuan a chhan pawh min rawn chhang ta lo reng a.

A tuk zan facebook kan han lut chu, ka rin loh lutuk hian a message a lo awm ngat mai a. Min reply tih ka hriat rual in eng thu nge ni ang tih chuan, ka rilru a luah nghal a. Hawn ka chakna leh huphurhna chu a in chen ta viau mai a. Hawn chak si huphurh tak si chuan kan han hawng ta a. Tha a lawm tih hi a lo ni a. A profile ka check ngun tawh bawk a, Kolasib khua tho maw i nih kan ti nghal a. Ni e, mahse tun ah chuan ka awm rih lo a hi a rawn ti a. Khawi ah nge tun ah i awm a kan ti leh hram a. Chumi khua ah chuan private school ah ka thawk ve a tichuan min chhang a. Kolasib ah i lo haw ngai hrim hrim em kan ti leh a. Haw ve zeuh zeuh thin e, kar kal ta mai pawh khan ka rawn haw a sin a ti a. Ka rin ai daih chuan biak a lo nuam a, kan in be chho ve ta fo mai a.

A chanchin te chu min hrilh chho ve ta zel a. Unau hmeichhia hlir pathum hi an lo ni a. An upa ber erawh chuan pasal a nei tawh a. A rukin ngaizawng viau mah ila, min ngei ka hlauh avang in thian biak bak chuan ka be ngai lo. Zan khat chu a rawn haw rih lawk dawn thu hi a rawn sawi a. Ka rawn leng dawn a nia, i phal em kan lo ti a. Len ringawt te chu phal lutuk e a, hi a rawn ti fiam a. An in awmna lai vel te chu kan in hrilh chho ta a. A rawn haw zan chuan ka thianpa pakhat sawm in, kan va kal ta a. An in awmna lai nia a sawi chu, In pakhat ah chuan Jenny te in hi khawi lai nge kan han ti a. Kan in piah piah leh chiah saw a nia tichuan min lo chhang a. A sawina in kan va lut chu, naupang pakhat chiah hian sitting room ah TV a lo en a. Kan lut sual nge min bum ni ang aw ka ti rilru a. Min bum a lo nih vaih chuan ka thianpa ka hruai si a ka ti a. A ruk chhuan ka zak rilru hman reuh khawp mai a.

Naupang pakhat lo awm hnen ah chuan, tumah midang an awm na nge kan han ti a. A ni chuan pindan a a pu ni ngei tur chu an au nghal a. A pu i thiante a niang an lo leng an ti a. Kan thian dun chuan kan in en a, kan nui tawp ringawt a. A pu ni ngei tur chu an rawn chhuak ta a. Engnge ni in duh hi a rawn ti a. Kei chuan Jenny te in a ni em aw, a thiante kan nia a kan ti a. Mami thiante maw in nih a, ti khan lo thu rawh u. A u nen kuhva an lei lawk a, an rawn thleng tep ang. Thil ka ti lak lawh lutuk a tichuan, pindan ah chuan min luhsan leh ta a. A hnu reivak lo ah chuan nula kum sawmhnih bawr vela tur pahnih hi, an rawn lut ta a. Pakhat zawk chu Jenny a ni tih ka hre thei nghal a. Jenny chuan in rawn thleng der tawh a ni maw! kuhva kan lo va lei lawk a. Leng reng rawh u aw, thingpui te kan lum dawn nia a ti a. Ka lo zah ruk deuh pawh chu a reh ta huai a. Thlalak a ka lo rin dan ai in a lo nu lian a. Chuvang nge a naupan ang ai chhuan, a puitling hle in kan hre nghal ngawt a.

A awm chhung chu zantin kan va leng ta ziah a. Ni thum hnu chuan a hna lam ah a chhuk leh ta a. Hmaichhan a ni tawh lo bawk a, Ka huaisenna zawng zawng sawm khawm in, hmeltha leh fel ka tih thu chu kan hrilh tan ta a. U Tluangpui, i ho reuh e mai tih bak chuan min chhang thiam lo a. Min hnial dan a thiam loh vang nge, min lo duh ve deuh tho zawk. Kan in ngaizawng chho chu a ni ta mai a. Kan han in ngaihzawn chhoh tak ah chuan, ti hian min han hrilh ta a. Ka thiannu hian ngaihzawng chu Upa deuh pawh ni se a pawi lo, zu an in loh phei chuan min duat duh daih zawk a ti a. Kum sawmpanga zet in kan in thlau na a. I lo fel bawk nen, a lo sawi dik khawp mai hi a ti a. Mahni chuan ka hlim ru ve veng veng thin a.

Kan in ngaihzawnna pawh thla thum vel a ni ve ta a. Min hmuh pah a rawn haw zawk hi a tum a. A hma in in hmu tho tawh mah ila, in ngaizawng ang a kan han in hmu ta chu, an lai khawp mai a. Han biak pawn a rul tawk lek chauh hian min chhang a. Restaurant ah kan chawlhpui ve lah in a zak nge, engmah pawh chu a ei tha ngam mang lo a. Chutih rual chuan an in chhung ah erawh, a kum ngaihtuah ai mah in a puitlinga. Kan in ngaihzawm te pawh a chhung te, a hrilh tlang vek leh ang lawi a. A nu leh pa te nen pawh kan in nel chho viau mai a. Ruihtheih thil ti lo ta chu kum lam in thlau viau mah ila, min duh der ve ni ber hian ka hria a. A changtu chiah hmeichhia erawh hi chuan min be chhe hran lo hian, min lawm lo riau hian ka hre thin.

Kan in ngaizawng rei ve ta tial tial a, thuruk engkim kan in hrilh tawn thin a. Chuta a sawi thin pakhat chu, a u chuan min duh pui loh thu a ni. Amah erawh chuan min ngaih telh telh thu te, puitling leh fel min tih zia te min hrilh ve thin a. A u pawn a hre chiang telh telh ang che nga, a la duh viau tho mai thei che a nia a ti thin a. Inneih chungchang te thleng pawn kan sawi dun chho a. Kum 25 tal tlin ve phawt a inneih a duhthu a sawi thin a. Kei pawh in chu chu tha ka tih pui in, ka ta tur tho a lawm ti chuan ka tur duh bik lo a. Kan inneih hun tur erawh, kan sawi nasa dun thei hle thin a. Krismas te pawh an lo thleng chho a. A ni pawh Krismas hmang turin a lo haw chho a. Krismas mai ni lo Kumhlui thlah zan te thleng pawn, kan hmang ho a. Zanlai inkhawm ah te pawh kan Biak In ah te rawn Inkhawm ve in, ban hnu ah ka motor in Kawnchei te kan enkual ve a. A u chu tih lawm ngai a ka hriat avang in kan hruai ve a. Ka be chho lui ve char char a.

Kum thar a zo a kal leh nan, zanhnih chiah a awm tawh a. Hun ka pawh ka ui in, ka thianpa pakhat sawm in kan va leng a. Tah chuan a ni kan hma hun kan hriat loh zia ka hriat thar a. Rilru na leh zak teuh chung a ka haw tak ni. Kan va thleng chu zan dang ang in an lo hlim lo hle mai a. Han biak pawn a rul tawk lek bak chuan min chhang lo a. Nakin ah a u zawk chu rawn tawng chhuak in, Tluangpui rawn leng duh tawh suh u min ti ta mai a. A hma a han in bakaihna kan neih hran loh avang in, ka nui liam satliah ve mai a. Chuta min chhanna chu a ni ka rilru ti na a, ka zah tak chem chem ni. I nui hmel hanchhiat turu zia kha min han ti zui a. Han haw nghal deuh chuk chuk ka zak bawk si a. Rei vak lo kan thut hnu chuan ka haw ta a. In ka thlen hnu chuan thil awmzia zawh fiah tum in call kan tum nghal a. A Phone chu a in ring ral ta thak thak mai a. WhatsApp lam atang a kan tih lah in, seen kulh si in min chhang duh miah lo bawk a. 

Han len leh pawh chu a hma boruak nen, ka ngam bik tawh lo a. Rilru na tak erawh chuan han call chu ka tum leh thin a. Chu pawh chu a in ring ral loh leh a Switch off hmiah zel a. Zan khat ka WhatsApp kan en chu, a message hi a lo awm tlat mai a. Kan han seen chu ti hian an rawn ti a. U Tluangpui khawngaih in min hre thiam hram rawh aw, Ngun tak a ka ngaihtuah hnu in kan inthen hi a tha zawk in ka hria a hi a rawn ti a. Engvang chuan nge a thatna kan ti nghal a. I hmel hi ka duh chi a ni lo a, chubak ah kan in upat hleih lutuk hi a rawn ti a. Chung te chu kan in ngaihzawn tirh pawn i hriat vek kha, chuti chung pawn inneih te thleng in kan sawi dun kha a ni a. A va lo han mak leh si ve kan ti a, Min rawn chhang let ta rih lo a. A hnu deuh hlek ah chuan min rawn chhang leh ta a. Kan in then chhan ah a u ka puh a hlau deuh nge, ka u vang pawh a ni lo keima thutlukna liau liau a ni a rawn ti a. A whatsapp dp pawh chu rawn thlak zui in, a rualpui awm vel Rawlthar pakhat nen an thlalak hi a rawn dah ta a. WhatsApp ah pawh chuan min bloc zui ta nghal a. Chumi kan hria chu ka rilru hi a na em em mai a. Ka mit sulh mai dawn hian ka hria a, thikna thinlung nen ka mittui chu a sur sung sung mai a. Ka kum zat ka ngaihtuah a, ka in ti pachang tur a ni ka ti leh thuai a. 

Jenny lenlai rual lo hi a va pawi tak em. I rawn haw hun tur ringawt ngaihtuah hian, a chang chuan mutmu pawh ka tuah hlei thei thin lo a. Mahse kan han in hmu ta cheng a, U Tluangpui min ngaih thiam rawh tiin, mi dang min neihsa leh ta si a. I rualpui deuh val nen in hlim dun dawn phawt chuan, kei chu mittui nen pawh ka kiang mai ang a. I hlimna thlen ve tur hian ka upa tawh bawk si a. Kei chu min ngaihtuah miah tawh lo la, I hlimna hi kei chuan ka duh ber a ni a. Ka hma ka lo sial lutuk vang in, pa te rual deuh thaw nei turin ka lo beisei che a. Jenny ka dem lo che, hmangaih luat vang hian ka dem lo che ka ti a. Mittui tla zawih zawih chung in he hla hi ka sa ta a.

Dar ang tawn tur ka dawn chang in
Zan mu chhin zai ka rel thei lo
Ka thinlai lungruk a hlim zual thin
I hlimthla ka thir in

Mahse dar ang ka tawnni chuan
Thinlai chhum ang a zing ruai e
Ka lawm lai Di in anka nem min hlan
Min ngai thiam rawh tiin

I thinlai ruk a hlim dawn chuan
Sir ah damten ka liam ta nge
I hlimlai par ang ti vul reng an
Ka tling zo ve si lo

Ka chan tur reng chu dawn lo in
Hlimten zamual chu liam ta la
I hringnun par ang a vul ve chuan
Ka tuar nem ang lunglen

Ngaih ngam tei in va bei ta la
Hmangaih luat vang hian ka dem lo che
Thaval dang i pawm hi