Phuloh D

Tluangpuia Hilthang
Kolasib

Sunday tlai a ni a, KTP ka over kum chiah a ni bawk a. Kan thenawm lawk ah chuan, Pathianni tlai KTP Fellowship ho, an zai tuar tuar mai a. KTP a ka in hman ve hun lai te, ka ngaihtuah kual a. Ka khua chu a har ngawih ngawih mai a.

Chutih lai tak mai chuan kan thiannu pakhat, a kawm pawh ka kawm tam lutuk loh hian, min rawn phone ve teh tlat mai a. Tluangpui, vawin tlai lam tih tur i nei em? I hman chuan ka thiannu damlo, min han kan pui lawk teh a. Kal zuai a ni mai hi a rawn ti a. Ka tih tur nei lo lutuk in ngaihtuah lunglen lai a lo ni nen, hawi khaw thawn pah a ni mai a lawm tichuan, awlsam tak chuan ka lo aw liam ve mai a.

Ka Scooty chu la chhuak nghal in, ka va sawm phei nghal vat a. A thiannu damlo kan tur chuan, kan chhuak ta a. Kal kawng ah chuan, kan damlo kan tur hi a fel a nia aw ! I duh chuan ka tihpui ang che min han ti a. Mahni a in hai kaw zo lo kan nih chu hre ve tho mah ila, thiante tihpui nih erawh kan lo zak ve tum hrang bawk si a. Aw pawh ti lo, Ai pawh ti lo chuan ka nui liam ve ta ringawt a.

Kan damlo kan turte in tur kan va thleng chu, ka thiannu chu kal hmasa in, a hnung ah kei in ka zui a. A chhungten min lo hmuh chuan, in va han fel em em ve. Room ah khan lut tlang nghal mai ru. Amah pawh a tha tawh lutuk, a in ti note deuh a, a la mu ve mai mai a nih kha an lo ti a. Room ah chuan kan lut zui ve nghal mai a. Kan damlo kan tur chu, amah chauh in khum ah hian a lo mu a. Phone hi a lo khalh nuap nuap mai a.

Ka thiannu chuan kha i damlo chu i va zia awm ve ? Phone te lah lo khalh nuap nuap mai che an ti chu, a phu zawk mai a. A phone ken chu a dah nghal a. I va han fel em em ve, in rawn kal duh kher a. Ka tha tawh lutuk a lawm, awm mai mai hi a ninawn lutuk a. Story te ka lo chhiar kual vel mai mai a. Khum ah hian lo thu ve mai ru min ti a. Ka thiannu chu a thu ve mai a, kei erawh ka rit bawk nen ka inthlahrung deuh a. Choka a Plastic chair chu ka va la ta zawk a.

Thutna ka rem fel chu ka thiannu chuan, Mampui ka thianpa hi Tluangpuia a nih hi ! Story ziak peih ve deuh kha i hre ngai em ? an han ti a. A thiannu chuan a hming chu hre thin e, Story chhiar hrat tih tak ah, a thuziah te chu ka chhiar fo mai. 'Di hlui' tih a ziah phei kha chu ka duh lutuk an rawn ti a. Mahni tawk ah nula fakna han dawn chu, a nuam ru ve veng veng nghal mai a. 

Engtin nge in in hriat zawk ? a thiannu hnen ah chuan an ti a. Kan veng ah a lawm an awm an ti a. A lo ni maw ! Kolasib a ni tih hi chu ka hre tho a. A thuziah ah hian, Kolasib tih hi a dah deuh zel a, tih pah chuan min rawn en a. Kei chuan Kolasib ka ni tih a chiang deuh a lawm ! Chu nangpawn Kolasib ka ni tih, min lo hriat phah ve a kan ti a. A dik ve reng tho, a hrim hrim in i rawn kal ve a, ka lawm lutuk aw a ti a.

Reivak lo kan thut leh hnu chuan, kan haw zui ve nghal mai a. Chubak Mampuii chu han biak chhunzawmna ka nei hran lo. An in kan len atang a, kar khat vel hi a ni tawh ang. Ka chhungte dang an awm si lo a, Tlai chawhmeh tur dal hi ka kang a. Chutih lai tak chuan ka phone hi a rawn ri ral ral mai a. Kan han en chu number hriat loh atang hian a lo ni a. Thil pawimawh a nih ring chuan kan han la ta tho a.

Kan han la chu U Tluangpui, Mampuii ! Chawlhni tlai a damlo in rawn kan kha ka ni a. Ka thiannu hnen ah i number ka dil a. Ka rawn be ve tawp che a nih hi ! Thuziah thar i nei em, i phal chuan min lo pe teh a. Dawr nghah pah a chhiar ah hi a rawn ti a. Kei chuan tun ah mai chuan nei lo e. Chubak ah Thungaihnawm Huang leh Story FB a ka post hma chu, hmun dang ah ka pe chhuak ngai lo ka lo ti a.

A nih chu maw le, chumi Group ah chuan ka awm ve ve tho, a pawi chuang lo e. A hrim hrim in tih tur i neih loh chang te chuan, ka dawr ah te pawh rawn leng ve thin la a rawn ti a. I phal phawt te chuan teh reng mai, khawi lai ah nge i dawr chu a awm kan ti a. A awmna lai vel an sawi chu, ka hre thei nghal mai a. Remchan ve leh ka lo leng ang tichuan, kan in thlah ta a.

Tlai khat ka sam met hi Mampuii min sawmna kha ka hre chhuak thut a. Ka meh zawh hnu chuan ka va leng ta a. I va han fel em em leng reng rawh aw ! Thingpui te kan in dawn nia a ti a. Tih tur dang ka nei hran lo bawk a, ka thu ve ta reng a. Thingpui te chu han ko in, kan han in dun leh te te a. Thingpui kan in zawh hnu rei vak lo ah chuan ka haw ta a. Chuta tang chuan Mampuii dawr ah chuan ka leng ta fo a. 

Zan lam ah WhatsApp a thu fahrah tete in thawn in, kan in kawm zui leh thin a. In kawm zing ta viau chu, kan in nel chho telh telh a. Kan in ngaizawng chho chu a ni ta mai a. Kan han in ngaizawng chho chu, tleirawl in ngaizawng ang mai in kan in thlahlel a. An dawr leh in bul vel a mite phei chuan, Home Guard hlawh neilo min ti fiam hial thin. Chung avang a len tlem erawh, ka tum phah chuang lo a. Tum pawh ni ila, ka thei lo a ni ber zawk.

Mampuii hi fanu mal a ni a, unau pathum niin an mi lai a ni bawk a. Pasal nei tur a ni pawh ruat fel vek tawh ah, a pasal tur chuan Accident avang in a boral san a. Chumi hnu kum nga na ah, kan khaw pa khawsa ve thei tak fapa, pasal ah a nei a. A pasal chuan aruk in zu a lo in nasa viau mai a. An inneih atang a thlakhat hnu ah phei chuan, sawisak a ching chho tan a. Reivak lo chu an dawh ve hram hram a. Kum chanve vel chauh an innei hman tih in, an in then zui leh nghal mai a. 

Chuta tang chuan pasal neih pawh, a ngaihsak em em tawh lo a. A sumdawnna leh a dawr ringawt chu, a buaina a ni tawh mai a. Kohhran leh khawtlang ah erawh, a mawi tawk chhuan a ti chho ve tho a. Awlsam taka sum han hmuh chhuah dan pawh a thiam a. Sum hmuhna tur chi thian thar siam dan lah a thiam. Sumdawng a nih avang in zin pawh, a zin chhuak nasa viau mai a. Silchar mai pawh ni lo in, Guwahati thleng hian a kal deuh reng mai a. Thian zaho a kal an nih thin avang in, ka ngaih erawh a tha lo hran lo.

A rawn haw hi chuan thil engemaw, chhe te tal hi chu min rawn hawn ziah a. Chubak ah a zin chhung a, min ngaih thin zia a sawi fo a. A phone pawh a zin lai chuan, min rawh phone nasa thin hle reng a. Chung a bungraw lak pui thin zing ah chuan Pathlawi pakhat, kum sawmli panga bawr vel tur hi a awm ve a. Chu pa chuan Bolero pick up hi a nei. Chu pa motor chuan, a thiannu pakhat nen hian an kal ho fo a. Chu pa pawh chuan kan in ngaizawng tih erawh chu a hre tho a. 

Mampuii lah chuan ka bul ah hian, ka thiannu hi a ngaizawng a. Man lo a motor hman theihna a ni bawk si a. Ka thiannu hian mahni chauh a zui a ngam thin si lo a. Ti hian ka dawr bungraw lak pah in, ka zui tel ve mai mai a nih hi a ti a. A tha ti chiah bik lo mah ila, ka rilru ah erawh han rinhlelhna a awm ngai lo. Nikhat an zin chhuak tur erawh, ka thiannu a hman lo thut mai a. Keimah in ka zui mai dawn? a hlauhawm chuang lo bawk a. Chubak ah bungrua ka hawn hnem thei dawn a. Kei te chu eng atan mah min ti lo hrim hrim. Ka thiannu bak chu hi a ti a. Ka rilru chu a in sual nasa viau mai a.

A tawp ah chuan zui lo zawk mai rawh. Hun remchang dang a la awm leh mai ang. Mahni chauh a mipa zui chu a tha lo ka ti a. Ka lo aw vek tawh a, thulh leh a zahthlak tawh. Chubak ah ka thiannu pawn, zuk kal pui hram teh ka hman bawk si lo. Hun dang ah kan la mamawh fo, dawn bawk si a ti a. A mah pawh a thinrim lutuk ang, kan lo aw lak lawh tawh bawk si a ti a. Ka thinrim ai a, a thinrim i hlauh chuan kal rawh ka ti a. Thil tha deuh ka lo hawn ang che a ti a. Kal luih chu a tum ta tho a.

An kal zan min rawn phone pawh chuan, hei room hran ve ve ah kan riak. Mahni a riah chu ka hlau ru khawp mai a rawn ti a. I hlauh loh kha, room khat ah riah tur a lawm. A hlauhawm loh i tih mawlh mawlh kha ka ti a. Hlauh te chu ka thiannu bialpa a ni a, hlau lo teh reng mai. Room khat a riah i phal a mi a rawn ti a. Kei chuan i kal pawh ka phal lo a, I kal lui tho chu a ni kha, Eng ah mah min ngai lo bawk a, eng ah mah ka ti tawh bik lo che ka ti a. Ka phone chu ka dah ta hmak mai a. Min rawn call leh pawn ka la duh ta miah lo a.

A ni pawh chuan ka lak duh a ring tawh lo nge, min rawn call nawn duh ta bik lo a. A ruk a thikthu nei tun chung chuan ka mu ta a. Mut pawh chu ka muhil hlei thei lo a. Zing ah pawh chuan min la rawn call let ta miah lo a. Zuk call leh hmasak tur zawk emaw ka ti rum rum a. Ka thu awi lo in a kal a, ka thinrim ka ti tau kha a ni si a. Zuk call hmasak leh chu ka tlawmngai ve deuh bawk si. Min call let ta lo zel bawk nen, an rawn haw hnu thleng chuan ka be duh ta lo a.

An rawn haw hnu ni hnih vel awm ah chuan, ka lungleng lutuk chu ka han be ta nge nge a. A vawikhat na ah chuan la duh lo in, a in ring ral thak a. A vawihnihna ah erawh chuan a la ve ta nge nge a. Ennge rawn sawi duh i la neih cheu a. Min then fel tawh a ni lawm ni ! Kei pawn ka then fel hmak tawh che, bialpa thar ka nei hi a rawn ti ta mai a. Chu thu ka hria chu, ka sa ngal pup pup mai a. Thinrim tawk chuan, Khawi a mi maw kan ti nghal a. I hriat ve zel a ngai lo, ka duh duh ka nei ang, i thu lo e mai hi rawn ti a.

Thu lo reng e, kal suh ka tihna ah pawh i kal lui reng a lawm. I thiannu bialpa, Pathlawi motor nei bak va ni suh kan ti let ve ngat a. Duh leh Pathlawi pawh ni se ka nei ang. Ka thiannu bialpa pawh a ni leu, ka bum mai mai che a nih kha, min ngaihzawnna a rei tawh lutuk. Nangmah nen kan in ngaihzawn avang in, ka hnar fi thla char char zel a. A mah phei chuan ban la, i ban rual in ka nei nghal ang che min ti char char thin. In leh lo motor leh dawr thleng in ka nei a. Ka fa hmasa te chu a nu in a enkawl thei a. Kan pahnih leh kan fate ta tur a ni mai a ti fo. Amaherawh nangmah zawk in min then hmasak hma kha chu, ban hmasak che ka duh lo a. Hman zan khan min rawn then fel ta bawk a. Tun ah chuan a ta taktak ka ni tawh, a rawn ti ta mai a.

Chu in chesual tawh tihna a mi ka ti leh kher a. A hma kan zin ho chhung zawng khan, i tan ka rinawm tlat reng a. Hman zan ah pawh khan, room hran ka la thlap nghe nghe. Kha tia min rawn ban a, room khat a riah pawh I thu vek a lawm i rawn tih khan, nangmah ah beisei tur a awm tawh in ka ring lo a. Chesual lo mah ila, min ringhlel tawh dawn tho tho a. Kan innei nghal vat dawn nia a tih vang in kan chesual a, room khat ah kan riak dun ta chauh zawk a ni. Chu thu i hriat avang chuan i duh leh min tih mualpho tum la. Zanin hian in ruk kan tum tawh tho a. Ka hrilh tlang ve mai mai che a nih ber chu, i rilru te kha i lo tina lutuk ang a. In awh hlum te kha i lo tum palh tak riau riau in tichuan, min rawn deuh sawh zui nghal a.

Chu thu kan hre tel phei chu ka na lutuk hi a ni tawp mai a. Mampui, hman ah khan min duhthu min hrilh in, i zin lah in thil min rawn hawn fo a. A chang chuan thinrim ve thin mah ila, ka hmangaih em avang che in, ka hlimna ber i ni thin a sin. Hman zan pawh khan ka thu i awi loh avang in, ka ti tau ve rih a ni mai a. Then hlen che ka zuam reng reng lo. Nang in kha kha remchang ah la in, midang min lo neihsan phah chu a ni si a maw ! Motor, in leh lo tha leh dawr erawh ka nei ve lo. Mahse ka hmangaih tak tak che a sin ! Phuloh pui maw kan lo tawn che, Kei ka tuar an a na lua e. Phuloh nang vang maw, nau ang ka tah ka ti a. Mittui sur sung sung chung chuan ka phone chu ka dah ta riau riau a.

Hman ah khan in e, phuloh aw mampui
Biahthu kha zawng kha kan in tiam a
Ka dawn lungruk zawng a hlim thin
Mahse lengdang min belhsan leh mai si

Phuloh pui maw ka lo tawn che
Kei ka tuar an a na lua e, Aw di
Phuloh nang vang maw
Nau ang ka lo tah

Kei chuan e mampui samang ka then lo che
Mahse i duh zawng ka tling si lo
I lungdum tu chu pawm la e
Khuarei ah lunglen ka bang ve mahna

Nang chuan lengdang min belhsan mah la e
Kei chu kan sulhnu ka chhui ta nge
Nang vang a ka riang sei tur hi
Dawn in han ngai ve la aw, di mampui