Phairam chulhnu

Tluangpuia Hilthang
Kolasib

 

A hming a Section Secretary han nih ve tak ah chuan, YMA hnatlang chu thulh loh hram ka tum ve thin a. Kan Branch YMA in Electric hrui pawt leh a ban vel thiar a in hlawhna kan hmu teuh mai a. Branch han in hlawhna mai tur avang thei si a, hna tau teh lai tiin han hnar then kan phal vak si lo a. Hnatlang a zing in hmun hrang hrang ah kan thawk kual thin a. A hna a hahthlak viau na a kan hruaitute an rem hre hlauh a. Chhun chawhmeh lam an bei tui thei thung a, hah man pawh a awm thei viau thin a ni. Nikhat kan hnatlang chu kan beisei loh ram daih ah hian kan kal a. Chu lai ram chu hman ah vawikhat ka kal tawh a. A hnu ah vawikhat mah kal leh ta miah lo . A kumkua na chiah ah kan kal ve leh ta chu a ni a. Ka upa sawt tawh tih loh ah chuan ka ram kal ka zei loh dan, a la pangai reng a. A hnim in a kawng a mumal bawk si lo a. ho tete ah hian ka tawlh thlu leh thuai mai thin a.

He lai ram hi Rengte tlangsang ram kan ti mai thin a. Kan khaw hmar lam KM 5 vel bawr a nih ka ring a. Ka Pu ka nu u hian Forest Plantation vah sa lo ah a nei ve a. Vaimim leh Fanghma a thar vanglai hi a ni a, In ei tur rawn phur ve rawh u a rawn ti a. Kei Class IX lai zir ve tawh chu ka nu leh pa te chuan, Tluangpuia hi hruai ve mai la an ti a. Fanghma leh Vaimim phur tur chuan ka pu chu ka zui ve ta a. A tir lam a ka phur ang ai in a ram a awi bawk si a, ka tlu ka tlu bawk nen, ka in chhir rum rum mai a. Dam leh him tak chuan thlam erawh chu, kan thleng thla ve ta tho a. Ka pu chu Vaimim leh Fanghma zawng in a chhuak nghal a.Kei chu thlam lo nghak rawh aw a ti a. A chhuak chiah chu thlam namthlak ah chuan ka mu duai mai a. Han kawm tur thian an awm bawk si lo a. Haw thuai thuai ka chak khawp mai a.

Chutia khawhar ru deuh taka ka awm lai chuan, Thlam chhak lam ah hian hmeichhe pahnih in be thawm hi ka hria a. Kan ri te pawh an feh a nih hi tih leh thlam a rawn luh chu, an rual nghal titih ta mai a. Kei min rawn hmu chu Pu Thanga te nau a mi i nih min han ti nghal a. Ka pu ka nu u a nia tichuan kan han chhang a. A rawn kalpui a fanu emaw ni hnen ah chuan, Mami hei thian tur i nei bawk a, ti khan thlam ah lo awm dun u la. Kei pawh chawhmeh ka va zawng ve nghal a nge a ti a. A ni pawh chu a chhuak zui ve nghal a. A fanu emaw ni, Chu tleirawl kan hmu chu hmeltha hi ka ti khawp mai a. Ka ram kal inchir leh deuh pawh chu, vannei ka in ti leh viau mai a. A mah lah chuan min be hmasa bik ngam lo nge, a ngawi ta reng mai a. Chutah a mipa zawk ka nia lawm tichuan kan be hmasa ta a. Chhuak ta kha i nu a mi kan ti ve ta thuai a. Han biak hmasak tak ah chuan, Aw ni e tichuan min han chhang a. Lo ah hian i vawikhat rawn fehna a mi min ti let a. Aw, ka Pu hian vaimim lo phur ve rawh min ti a, ka hnial hreh si a ka rawn zui a night hi ka ti a. Kei chu ka feh ve fo tawh a sin, School chawlh hi chuan ka nu hian min hruai ve ziah thin. Mahni a kal hi nuam a ti bik lo a, Ka peih loh deuh pawn min hruai lui tlat zel hi a ti a Pawl engzat nge i zir tawh kan ti a. Kumin ah pawl VIII ka zir tan ve chauh a, nang pawl engzat nge i zir tawh zawk min han ti a. Kei pawh pawl IX ka zir tan ve chauh ka ti a. A nih leh khawi veng ah nge i awm a kan ti a. An veng hming an sawi chu kan lo in hnaih lo nasa mai a. Aizawl khua kan nia, ka pa hna avang in kan lo awm a. Kum nga vel chu kan awm ve tawh awm e. Quarter a remchang hlauh a, fal deuh mahse kan luah ta tho a. Kan awm tirh phei chuan kan la te deuh nen, kan hlau thei khawp mai a. Tun ah erawh chuan a tawh zawkin ka hria a ti a.

A lum i ti ve tho em min han ti a. Ti teh reng mai, chuvang chuan a lawm thlam namthlak ah ka awm ka ti a. Hawh tuikhur ah va in bual ila, i duh em min han ti a, A hla em kan ti a. Saw lai lawk saw a ni mai, thingpui lumna tur tui kan chawi pah a nga a ti a. Nia, tui pawh a tam loh hi ka ti a. Vau lam pan chuan Plastic bur keng in kan kal dun ta a. Kan va thleng chu mau hian tui a lo khawh tur tur mai a. Plastic bur ah chuan tui han ti khat hmasa a. In bual chu kan han tum ta a. Nang in bual hmasa rawh min ti a. Keiin nangmah zawk ka ti thung a. A tawp ah chuan in bual rual mai ang a ti ta a. Ka kawr chu kan phelh mai a, Ka kekawr erawh ka phelh ngam rih lo a. Ka lu leh hnung hi ka ti huh ringawt rih Mai dawn ka ti a. Kei chu ka in ti huh vek dawn, a lum leh dawn e mai a ti a. A kawr chu a phelh a, in bual tum sa a lokal a ni nge, a hnuai ah chuan kawr dang a lo la hak thuah bik a. Chumi nen chuan a in khawh tir ta pur pur mai a. Ka lu chu kun in ka va in khawh tir ve rawh. I ban khan lei nem la kun la, I hnung tal chu ti huh ve rawh a ti a. Ka duh lo, a lum leh dawn tho ka ti a. Ka lo nuai sak dawn che lawm a ti a.

Tui chuan ka hnung ah a rawn theh thut mai a. A vawt lutuk tih pah chuan ka kekawr a huh dawn ka ti nghal a. Rang tawk in lei ah chuan kan in nem khalh nghal a. Kha ti khan a ni mai a lawm. I bialnu pawh ni hlei lo, lo zah ve viau te chu min han ti zui a. I la ni mai thei a sin ka ti ve ta ngawt a. Teuh lo mai, ka duh zawng mi i ni lo, chubak ah matric ka passed hma chu ngaihzawng ka nei dawn lo a ti a. Kei pawh Matric ka passed hma chuan zirna a tibuai ka ti ve ta daih a. Nei dawn pawh ni la, i hmu dawn a mi min han ti a, Hmeichhia te chu in tam a lawm ka ti let ve leh ngat a. Kan han in bual zo chu, kan plastic tuichawi pah chuan kan haw phei ta a. Thlam kan han thleng chu Thingpui lum ang a ti a. Feh thang tih tak ah mei te chu a chhem ta zung zung mai a. A mipa zawk chuan ka en ta reng mai a. A chawn kan va en chu a lo thi a. I chawn a kha vangvat i kai a niang kan ti a. A nih dawn hi maw le, vangvat hi ka hlau teh mai a nia a ti a. Lehlam hawi chung chuan kan laksak ta a. Chemkawi khan tan nghal rawh a ti a. Thlam luika ah chuan ka va tan ta a. Ka in ti pa ve viau na a, vangvat hi chu ka hlau teh mai a nia hi la rawn ti hram a. 

Ka pu chawhmeh zawng pawh chu, a rawn haw phei ta a. Mazir, thingpuite in lo lum a law! I nu han au la, Chaw te pawh fak dawn tawh ila, Chaw te in fun hrim hrim em a ti a. Maziri chuan aw fun e a ti a, a nu chu an au nghal a. A nu chuan min lo ei san rih mai ru, ka in la lak lawh rih lutuk a hi a ti a. Kan chaw fun chu ka pu chuan an phelh a. Mazir i nu i nghak dawn nge, i lo ei ve nghal dawn a ti a. Maziri chuan ka lo nghak zawk a nge a ti a, Chaw chu kan ei san ta mai a. Chaw kan han eikham chu, ka pu chuan Maziri te rual hian lo han haw ve mai la, Ka la in la ngah lo deuh a, kan va in lak belh leh ang. Ka tlai deuh tak in lo han haw hmasa mai la a ti a. Ka bag ken ah chuan chawhmeh leh Vaimim vel chu min han rem sak a. A rit lutuk lo ang ti raw a ti a, a ruk chuan ka huphurh ru khawp mai a. Rit lo ang chu ka ti ve ta tho a. A kal chhuak zui leh nghal vat a. Maziri nu pawh chu ka pu chhuah hnu lawk chuan, a rawn thleng phei zui ve nghal a. Maziri chuan chaw ei ah ka lo la nghak che a nia. Tluangpuia hi a pu in kan rual in haw ve se a ti a, I in la ngah tawh hrim hrim em an ti a. Aw la ngah tawh e, ti nge min lo nghah kher kher a, lo ei ve mai tur a lawm a ti a. Chaw chu han bar sawk sawk ila, a nih leh kan haw vat dawn nia a ti a. Chaw chu an bar zui ve nghal a. Lo ei ve leh la min han ti a. Ka puar lutuk ringawt kan lo ti a. An chaw eikham chuan an phur tur chu an han siam nghal a. An siam zawh chuan haw lam zai kan rel ta a.

Thlam atang a chuan chhuak in, a hmasa ber ah ka kal a. Maziri chu ka hnung ah chiah kal in, a nu chuan hnung a rawn dawl a. Tlai dar hnih vel a ni bawk a, ni chu duhthusam in a la sa a. Kal kawng a in turin tui kan pai hlauh a. Chu chuan kan dang ro lutuk tur min chhawk hle mai a. Kawng a chho bawk nen ka chau Ang reng khawp mai a. Chawlh an rawt bawk si lo a, ka rawt zak ve deuh si a. Ka kal lui ve hram hram hi a ni ber a. Chutah Maziri chuan nu chawl tawh ila, Tluangpuia pawh a hah tawh lutuk ang a ti a. Ni dawn tak maw, Tluangpui i hah tawh em a nu chuan min han ti a. Hah lutuk hran lo e chu kan ti ve a. Kawng sir a thingbuk hlim deuh lai ah chuan, kan han chawl ta a. Chawlh pah chuan kan tui pai te chu kan han in a. Maziri chu ka bul ah lo thu hnai in, Tluangpui engnge nih i tum min han ti a. Politics lam hi ka pa te lo tuina sa hi a ni a. Sawrkar hnathawk lo a, politics lam kal hi ka chak ber a. Nimahsela, mi rel bur kan ni dawn tihna chu a ni mai a. Chuvang chuan Lecturer hi an awl in an hlawh hnem hmel bawk si a, ka chak viau tho mai ka ti a. Kei chu Nurse nih a damlo enkawl hi ka chak a, ka tum ber a ni a ti a. Maziri nu chuan in hahdam deuh tawh em? Kan kal leh tawh mai dawn a mi a ti a. Kan kal leh tan chu a ni mai a.

Ka hah leh tawh viau na a Maziri Nu chuan, kawngpui kan chhuak tep tawh tho a. Kawngpui ah law law kan chawl tawh mai dawn a mi a ti a. Chu chuan tlem in phurna min siam leh deuh a, rin ai tak chuan kan thleng har leh ta si a. Chawlh han rawt ka ngam tawh bik si lo, Ka la kal ve hram hram chu a ni a. Hmalam pan a kal ve ta zel chu, Kawngpui chu kan chhuak ve ta hlawl mai a. Kawngpui sir remchang lai ah chuan, kan phur te chu kan han in nghat fel a. Bilkhawthlir Bus lo haw hun tur chu kan chang ta a. Maziri nen chuan bus nghah pah in kan titi mai mai a. Tluangpui tiang a kan feh hi ka la ngai ngawt in ka ring. Tum ang a kan awm theih chuan ka pa hi, kumthar lam ah Aizawl ah an sawn hmel a. Aizawl ah chuan keini ang tan chuan lo neih tur, a awm tawh dawn lo a. Kolasib a kan awm lai chuan ka nu in school chawlh apiang in, lo ah min feh pui thin kan ti ang a. A bik in vawin ni phei chu ka theihnghilh thei tawh lo ang a ti a. Eng ngati maw kan ti a, a boruak hi a nuam ve hrim hrim a, nidang a ka feh ka chauh thin teh reng nen, Kawngpui te hi kan thleng hma sawt in ka hria. A chhan pawh ka hre bik lo a ti a.

Bilkhawthlir Bus chu a lo thleng ta a. Bus ah chuan kan phurte chu han hlang fel a, kan kal zui nghal a. Feh hawng deuh vek kan ni bawk, kan tawt em em mai a. Maziri nen pawh chuan kan thu dun thei lo a. Diakkawn kan thleng chho a, Maziri leh a nu chu an chhuk a. Kei chu ka la chuang tlang ta zel a. Mi kar atang chuan Maziri chuan rem leh rem lo hian, U Tluangpui Mangtha aw hi a rawn ti a. An rawn nui deuh sak a, Nang pawh le kan ti let ve a. Bus chu a kal zui leh nghal a. Ka feh leh ta lo nen, kan veng a in karakik bawk si a. Ka Sikul kalna lah Govt Diakkawn High School kan veng ah a ni a. Maziri lah veng leh lam daih ah, St John High School a ni thung a. In ngaizawng kan ni bawk si lo a, Vawikhat mah ka va leng ta miah lo a. A leng vak pawh vawikhat mah ka hmu chuang hek lo. Chutih rual erawh chuan Class X ka nih kum hian, an veng mi kan Sikul ah a lokal hlauh mai a. Peh hel ru ang reng tak, hre chak deuh bawk si hian Maziri chanchin chu kan zawt ta a. Kumin kumtir lam a Aizawl a, an in sawn thu min han hrilh chu, Maziri hmuh leh tum chu beisei bo mai kei thingtlangpa tan chuan a ni zo ta a ni.

YMA Hnatlang kan ni bawk a, tlem chuan kan zel thel deuh a. Ka thianpa pakhat nen, thir tlawn hi kan zawn a. Kum kaw liam ta a, ka Pu te lo kawng chu kan zawh dun ta a. Maziri'n Tluangpuia hi a chau tawh ang a tih a, Kan chawlhna hmun kha kan thleng thla ta a. Ka thianpa hnen ah chuan chawl lawk ila kan ti a. Thingkung hlim kan belh pawh kha a lo la awm a. Tah chuan Class IX ka zirlai a ka feh pui Maziri hre reng chung chuan, ka thianpa chu kan chawlh pui ta a. Kan chawlh pah a Maziri'n, Tluangpui engnge nih i tum a tih te kha kan hre chhuak uai uai a. Ka pa te lo tuina sa a ni bawk a, Politician nih hi ka chak khawp mai. Mahse mi rel bur kan ni ringawt mai dawn a. Lecturer hi an hahdam a, an hlawh hnem bawk si ka tih lai te chu a lo lang uar uar a. Lecturer nih chu khawi lam ah, Graduate pawh ka ni ta si lo a. Politician chu tlem in ka hnaih ve hret a. YMA Section Secretary party rawng kai lo tur a ngaih ah, kan chelh chho ve ta thung a. A ni khan Nurse nih a tum kha a ni a. Tun ah chuan kum kua daih a lo vei ve ta reng a. A zir chho ve ta nge, a zir thei ta bik chuang lo. Nge a tum te kha a thlak leh ta zawk niang, tihte thleng in ka ngaihtuah ta a. 

Kal lam chauh kan la ni bawk si a. Han chawlh reng chi ni hek lo, kan kal dun leh ta a. Hman a ka Pu te thlam awmna lai vel chu kan zuk thleng leh a. Teak a lo ding thelh sung tawh mai a. Chawl leh tawh mai ila, ka thianpa hnen ah chuan kan ti a. Ka thianpa pawh chuan ka lo rawt tep a a lo ti a. Ka pu te thlam hlui chhak deuh ah chuan kan chawl leh ta a. Thlam ah Maziri a chawn a vangvat kai, ka man sak lai a lo lut leh nghal a. A piah vau lam chu kan hawi phei a. Lang thei chiah lo mahse, Kan in bual a tui kan in khawh tir lai a lo lang leh a. Tui a min theh avang in, ka bawk sawk sawk nghal a. Ka hnung zang ah rawn tuai in, ka laina ni si lo ah, ka hnung min khawih sak hmasa ber tur a ni ta kha a ni a. Ka bialnu pawh i la ni mai thei a sin kan ti a. Teuh lo mai ka duh zawng i ni lo. Chubak ah matric ka passed hma chu ngaihzawng ka nei dawn lo te kha a ti a. Ka zah zel in kei pawh matric ka passed hma chu ka nei lo ang kan ti zui ve kha a ni a.

Matric a passed hma chu ngaihzawng a nei lo ta tak tak nge, a duh zawng mi ka nih loh vang in min hnar na remchang atan a sawi mai mai. Nge kha tih lai pawh khan a lo nei reng tawh zawk. Kei chu ka matric passed hnu kum sarih ah pawh, ngaihzawng ka duh loh vang pawh ni lo in ka hmuh zawh loh vang zawk in, ka la nei lo chu a ni si a ka ti a. Ka lung te chu a ti leng thar hle mai rengte tlang hnuai phai khawlum lutuk, hman a ka pu te lo thin chu a chul rup mai hian ka hmu a. Maziri ngaihtuah veng veng chung chuan, YMA hnatlang tih in theih nghilh thak in he hla hi ka sa chuak ta phawng mai a. Ka thianpa chuan a va leng awm ve min rawn ti a. Ka ngaihtuahna a ta chu ka harh chhuak nghal zawk a.

Phairam chulhnu ka fan chang in
A zual thin e, nang ngaih lai hi
A hmun leh tlangte dang si lo
Ka thlir ning thei lo e

A vul leh thei tak ang maw e
Ngaih lai D kan nun hlui
A chul leh uai mai tur an zawng
I phal dawn bik em ni

Chhun khawhar ni sensa hnuai ah
Engtin lo awm ve che maw e
A sei ngei dawn e, i zun ngaih
Sulhnu mahten ka chhui

In then nan khua a sei e mai
Nangnen kan hlim kan nuihna
Tuanna tlangte dang rih mahse
Han dawn ve ang che maw

I liam ta mualzapui dan ah
A dai chuang lawng i hlim thla leng
Nangnen kan tuanna fan chang in
I rauthla tawn ka nuam